Савол:
Айтишларича яҳудийлар, аниқроғи Яъқуб пайғамбар наслидан келган еврей миллати Қуръони каримда кўп оятларда мақталган экан. Шу тўғри?
Жавоб:
Ҳа шундай. Сизга бу ҳақидаги баъзи оятларни келтираман:
«Шубҳасизки, Исроил авлодларига китоб, ҳикмат ва пайғамбарлик бердик, уларга покиза нарсалардан ризқлантирдик ва уларни замондошларидан афзал қилдик. » (Жосия сураси 45:16)
«Эй Исроил авлодлари! Сизларга берган неъмат(лар)имни ва сизларни замондошларингиздан афзал қилганимни ёдда тутинг.» (Бақара сураси 2:47)
«Қасамки, Исроил авлодини ҳурматли жойга жойлаштирганмиз ва уларни покиза нарсалардан ризқлантирганмиз…» (Юнус сураси 10:93)
«Эй Исроил авлодлари! Биз сизни душманингиздан қутқариб қолганмиз, сизлар билан Тур (тоғи)нинг ўнг тарафида ваъдалашдик ва сизларга манн ва бедана тушириб бердик.» (Тоҳа сураси 20:80)
«Шундай қилиб, уларни (Фиръавн ва издошларини) боғу бўстонлар ва чашма-и булоқлардан чиқариб юбордик. Хазиналари ва қадрли масканларидан ҳам (чиқардик).
Шундай қилдик ва Исроил авлодини у нарсаларга эгадор қилиб қўйдик.« (Шуаро сураси 26:57-59)
«Баракатли қилиб қўйганимиз ўша заминнинг машриқу мағрибларини эзилиб жафокаш бўлган халққа ўзлаштириб бердик. Исроил авлоди сабр-бардош кўрсатгани учун, яратган Эгангни уларга берган гўзал сўзи амалга ошди . Фиръавн ва халқи санъат ила қилган ишларини ва юксалтирган барча нарсаларини хароб қилиб юбордик.» (Аъроф 7:137)
Савол: Эшитишимча уларга кўплаб пайғамбарлар келган экан, шу ҳам тўғрими?
Жавоб:
Ҳа, шундай. Уларнинг асл насаби аввало Иброҳим пайғамбарга тақалади. Яъни, Иброҳим пайғамбарнинг ўғли Исъҳоқ пайғамбарнинг ўғли Яъқуб пайғамбар наслидан тарқалган. Яъқуб пайғамбарнинг яна бир номи Исроилдир. Қуръонда уларга (еврей миллатига) Бану Исроил деб айтилади. Уларга оталаридан кейин ўгай укаси Юсуф пайғамбар бўлиб келган. Қуръонда зикри келган пайғамбарлар орасидан Мусо, Ҳорун, Довуд, Сулаймон, Закариё, Яҳё ва Исо пайғамбарлар айнан ўзларининг наслидан пайғамбар бўлиб келган. Мана шунинг ўзи ҳам ўша миллатга Аллоҳ тарафидан кўплаб яхшиликлар ва фазилатлар берилганига далолат қилади. Лекин, улар ўзларига берилган неъматларнинг қадрига етмади, нонкўрлик қилди, ўзларига пайғамбар бўлиб келган инсонларга адоват қилди, пайғамбарликка қарши чиқди ва улар келтирган илоҳий китобларга хилоф иш қилди, ҳатто ўша илоҳий китобларни ўзгартиришди, китоблардаги ҳақиқатларни яширишди, ҳақиқатларни ўрнига ёлғон нарсаларни китобдан деб даъват қилишди, Мусо пайғамбар Аллоҳдан ваҳий (китоб) олгани Тур тоғига чиқиб кетганидан сўнг, то у қайтиб тушгунга қадар яна ширкка ботиб кетишган, Мусо таълимотидан воз кечишган, кейинчалик ҳатто Мусо пайғамбарга: «Аллоҳни кўрмагунимизча Унга имон келтирмаймиз» дейишгача боришган, натижада улар орасидаги ҳаққа қарши чиқувчи кофирлари лаънатланган ва ғазабга гирифтор бўлган, яшаб турган юртларидан сургун қилинган (Бақара сураси 2:51-61, 83-93, 246, Моида сураси 5:70-73, 78, 110).
Савол:
Ҳозирда уларнинг қилаётган ишлари бутун дунёга маълум; зулм қилмоқда, Фаластин ерларини тортиб олмоқда, уларга қарши урушда ҳарбий низомларга риоя қилмаган ҳолда бегуноҳ ёшлар, қариялар, ҳатто тиббиёт марказларига ҳам авиа ҳужум қилмоқда. Бундай ҳолатда дунё мусулмонлари уларга нисбатан қандай иш тутиши керак? Аввалда уларга берилган Илоҳий жазо ҳозир ҳам берилиши мумкинми?
Жавоб:
Бундай ҳолатларда Исроилга сиёсий, моддий ва ҳарбий томондан кучи етадиган давлатлар Исроилнинг зулму ситамлари ва геноцидлик фаолиятига қарши бирлашиб уни тўхтатиб қолиши керак. Айниқса дини, ирқи ва миллати бир бўлган араб давлатлари шундай қилиши керак. Агар имкон борида Фаластинга яқин араб давлатлари Исроилнинг зулмини тўхтатиб қолишга ҳаракат қилмаса, ўз позиция ва тарафини аниқлаб олмаса, зулмга рози бўлиб қолаверса, Фаластинни бошига тушган кунлар уларга ҳам тегмай қолмайди (Ҳуд сураси 11:113) ҳамда мазлумлар тарафини олиш учун «…Аллоҳ тез орада шундай бир кишиларни юзага чиқарадики, Аллоҳ ҳам уларни яхши кўради, улар ҳам Аллоҳни яхши кўрадиган бўлади. Улар Мўминларга нисбатан камтар ва юмшоқ кўнгилли, кофирларга эса ғурурли ва кучли бўлади. Улар Аллоҳ йўлида курашади ва бу йўлда ҳеч бир маломатчининг маломатидан қўрқмайди… (Моида сураси 5:54)«. Ундан ташқари, Аллоҳ яҳудийларга Қуръонда қаттиқ огоҳлантирув берган ва зулмда ҳаддан ошганликлари сабабли бошларига ўтмишда келгани каби яна бошларига катта бало келишидан дарак берган. Алоқадор оятлар қуйидагича:
17:4 «Исроил авлодига/еврейларга (юборилган) китобда мана шу ҳукмни билдирганмиз: «Сизлар ер юзида икки марта бузғунчилик қиласиз ва жуда ҳадингиздан ошиб кетасиз.
17:5 Биринчиси учун жазолаш вақти келганида, кучли жанговар кучга эга бўлган қулларимизни тепангизга юборамиз. Улар (сизларни ушлаш учун) ҳовлиларингизнинг бурчакларигача сизни тинтув қилиб киради. Бу амалга ошадиган ваъда эди.
17:6 Сўнгра, сизларни қайтадан уларнинг устидан ғолиб қилдик. Сизларга мол-давлат ва ўғиллар билан мадад бериб, сизларни кўп қўшинга эга қилдик.
17:7 Яхшилик қилсангиз ўзингизга яхшилик қилган бўласиз. Ёмонлик қилсангиз ҳам ўз зиёнингизга. Кейинги (бузғунчиликни жазолаш) вақти келганида (сизларни қайғуга солиб) юзингизни қора қилиш учун ҳамда аввалги марта кирганидек (Қуддус) Масжидига яна кириб, эгаллаган нарсаларини тамоман вайрон қилиш учун (жанговар кучга эга бўлган қулларимизни яна тепангизга юборамиз).
17:8 Балки, яратган Эгангиз сизларга яхшилик қилиши мумкин. Агар (бузғунчиликка) қайтсангиз, Биз ҳам жазони такрорлаймиз. Биз жаҳаннамни кофирлар учун зиндон қилдик. « (Исро сураси 17:4-8)
5-оятда билдирилган жазо яҳудийларни Бобилга сургуни — қулликка маҳкум бўлиш даври эди. Энди улар яна ҳаддан ошиб кетса, ер юзида бузғунчиликни яна давом эттираверса 8-оятда айтилганидек улар яна яшаб турган юртларидан ва қўлга киритган барча нарсаларидан маҳрум бўлиши тайин. Чунки бу — оламларни яратган Аллоҳ тарафидан қилинган огоҳлантирув. Бу жазони Аллоҳ уларга Моида сурасининг 5-оятида билдирилган зотлар орқали юборади.
