Савол: Оилада аёли ёки фарзанди тарафидан қандайдир айб иш ёки хатолик кўрган мусулмон ўзини қандай тутиши керак? Бу ҳолатда уриш ёки сўкишга рухсат берилганми?
Жавоб: Аллоҳ таоло сиз берган саволга жуда кенг ва тафсилотли қилиб жавоб бериб қўйган:
“Эй Мўминлар! Жуфтларингиз ва фарзандларингиздан душман (яъни, ҳақингизга кўз тикиб турадигани) бўлиб туради; уларга нисбатан диққат-эътиборли бўлинг. Агар уларни қилган иши учун жазоламасангиз, (айбини юзига солавермасдан) уларга янги бир саҳифа очсангиз ва қилган хатоларидан кечиб уларга яхшилик қилишда давом этсангиз, билингки, Аллоҳ (ҳам) жуда кечиримлидир, эзгулик ва неъмат улашувчидир.
Мол-мулкларингиз ва фарзандларингиз сизларни синаш учун, холос. Қилган иши учун бериладиган буюк ҳақ ва эваз Аллоҳнинг ҳузуридадир.
Кучингизни борича Аллоҳга нисбатан гуноҳ қилишдан сақланинг. Унга (Унинг китобига) қулоқ солинглар ва итоат этинг. Сарф-харажатни жойига келтириб қўйинглар (Оилангиз учун инфоқ-эҳсон қилинглар) – ўзингизга яхши бўлади. Ичидаги қизғанчиқликдан сақланган инсонлар – муроду мақсадларига эришадиган кишилардир.” (Тағобун 64/14-16)
Демак, мабодо оилада аёл эрига ёки фарзанд отасига нисбатан ҳақсизлик қилиб қўйса, дарҳол уни дўппослаб уриш, жазолаш, шарманда қилиш, ҳар куни айбини юзига солишни ўрнига, қилган ишини кечириш, юзига қайта солмаслик ҳамда худди айб иш қилмагандек уларга яна-да яхши муомалада бўлиш бу Аллоҳнинг амридир. Уларга яхши гапириб насиҳат қилиш керак. Зотан, Аллоҳ таоло мусулмон оилада жазо ва жабр эмас, меҳр-муҳаббат, дўстлик, самимият ва садоқат биринчи ўринда туриши кераклигини Рум сурасининг 21-оятида баён қилиб ўтган.
Оилада турли муаммолар, тушунмовчиликлар ва зиддиятлар келиб чиқмаслиги учун, оятда келтирилган инфоқ-эҳсон мавзусига ҳам алоҳида эътибор қаратиш керак. Имкони бўла туриб, танқислик ва етарсизлик келтириб чиқарадиган даражада қизғончиқлик қилмаслик ҳам керак. Чунки, оилани бутун моддий таъминоти Исломда эркак кишига юклатилади.
Аллоҳнинг оятларини ҳаётингизга татбиқ қилиб яшанг. Шунда бахт нима эканини ҳис қилиб яшайсиз.
