Савол: Мусулмон оилада туғилган фарзанд билан кофир ёки ғайридин оилада туғилган фарзанд орасидаги фарқ. Мусулмон оиладаги бола ўз ўзидан ота онасига эргашиб шу динга амал қилади. лекин ғайри мусулмон оиладаги бола ҳам ота онасининг динида яшаб вафот қилади. Бу ҳолатда адолатсизлик эмасми. Савол нотўғри бўлса узр сўрайман. Шу саволга жавоб топа олмаяпман.
Жавоб: Вояга етмай туриб вафот этган болаларни жаҳаннамга тушади деб ким айтди?! Туғилганда ҳеч ким кофир ёки мушрик бўлиб туғилмайди.
Вояга етмай туриб вафот этган болалар жаҳаннамга тушмайди. Чунки, жаҳаннам жиноятчиларнинг (кофир ва мунофиқларнинг) борар жойидир[1], у ерга ҳар ким қилган жинояти, уюштирган фасоди ҳамда қилган фосиқлиги учун тушади[2], болалар эса вояга етгунча гуноҳ ва жиноятдан пок бўлади.
Вояга етмай вафот этган болалар ўзларидан аввал ўтган аждодлари орасидан ким жаннатга тушган бўлса, уни ана шуларнинг ёнига жойлаб қўйилади[3], агар-чи савоби бўлмаса ҳам. Бу Аллоҳнинг олийжаноблигидир.
Вояга етганидан кейин эса, яшаш тарзи ва динини ҳар ким ўзи танлайди. Дин ва имон иши қалбга тегишли ишдир. Имон қалбдан келади, қалбга эса Аллоҳдан ва ўша қалбнинг эгасидан бошқа ҳеч ким эгадорлик (ҳукмронлик) қилолмайди. Бу дегани, бировга имон-эътиқодни мажбурлаб сингдириб бўлмайди дегани. Демак, вояга етгач ҳамма ўзи учун ўзи жавоб беради.
Аллоҳнинг адолати ҳақида асло шубҳа қилманг. Унинг адолати ва тўғри ҳукм бериши ҳақида қаноат ҳосил қилиш учун, ҳам нозил қилинган ҳамда яратилган оятларга қараб чуқур тафаккур қилинг.
[1] Тавба 9/49, 68, Каҳф 18/53, Тоҳа 20/74.
[2] Анъом 6/49, Юнус 10/8, Наҳл 16/88,
[3] Тур 52/21.
