Ассалому алайкум домла! Қиёматнинг катта-кичик аломатлари қайси манбадан олинган? Қуръонда борми қиёматдан олдин
бўладиган ҳодисалар? Олдиндан раҳмат.
Ассалому алайкум!
Қуръони Каримнинг 7-сураси бўлмиш Аъроф сурасининг 187-оятида шундай марҳамат қилинган:
Бисмиллаҳир-роҳманир-роҳим.
یَسۡـَٔلُونَكَ عَنِ ٱلسَّاعَةِ أَیَّانَ مُرۡسَىٰهَاۖ قُلۡ إِنَّمَا عِلۡمُهَا عِندَ رَبِّیۖ لَا یُجَلِّیهَا لِوَقۡتِهَاۤ إِلَّا هُوَۚ ثَقُلَتۡ فِی ٱلسَّمَـٰوَ ٰتِ وَٱلۡأَرۡضِۚ لَا تَأۡتِیكُمۡ إِلَّا بَغۡتَةࣰۗ یَسۡـَٔلُونَكَ كَأَنَّكَ حَفِیٌّ عَنۡهَاۖ قُلۡ إِنَّمَا عِلۡمُهَا عِندَ ٱللَّهِ وَلَـٰكِنَّ أَكۡثَرَ ٱلنَّاسِ لَا یَعۡلَمُونَ
«Сендан (қиёмат) вақти ҳақида сўрашяпти. «Унинг илми фақат яратган Эгам ҳузуридадир, вақти келганида уни фақат Ўзи ўртага чиқаради. Унинг таъсири осмонлару-ерга оғир келади. У сизларга фақат тўсатдан келади», деб айт. Худди сен у (вақт)ни биладигандек, улар сендан сўрашяпти. «Унинг илми фақат Аллоҳ ҳузуридадир. Лекин инсонларнинг кўпчилиги (бундай эканини) билмаяпти», де.»
Бу ва бунга ўхшаш оятларнинг далолат қилишича, қиймат тўсатдан келади. Уни қачон келишини Аллоҳдан бошқа ҳеч ким билмайди. Зеро, унинг аломатлари келиб бўлди. Муҳаммад алайҳиссаломнинг сўнги пайғамбар бўлиб келиши бунинг ёрқин мисолидир.
Демак, қиёмат тўсатдан келаркан, энди унинг катта-кичик аломатлари деган мавзуга ўрин ҳам қолмайди. Қуръонда қиёматдан олдин бундай ишлар содир бўлади, ана шундай кейингина қиёмат бўлади деб асло айтилмаган.
Бу ҳақидаги яна бошқа маълумот учун қуйидаги оятларга ҳам мурожаат қилишингиз мумкин: Анъом 6/31, 47, Юсуф 12/107, Анбиё 21/40, Ҳаж 22/55, Шуаро 26/202, Анкабут 29/53, Зумар 39/55, Зухруф 43/66
