Савол: Ёшим (…) да. Университетни битирдим. Энди ишлаб бизга фойданг тегсин, бизни боқ, бир ўғилни ўрнини бос деб, ҳозиргача отам мени турмушга чиқишимни хоҳламаяпти. Мен уларни эмас, Оллоҳ ризоси учун никоҳли турмушга чиқдим. Оллоҳни тақдири билан ҳомиладор қолдим. Уйдагиларни бу ишдан хабари йўқ. Уларга айтгунимча ҳомиламни олдирсам гуноҳ бўладими? Агар айтмасдан дунёга келтирсам биламан, отам мендан ҳеч қачон рози бўлмайдилар. Қайси йўлни танлашим Оллоҳни олдида яхшироқ танлов бўлади. Фарзандимдан кечайми ёки, ота онамни норози қилайми?
Жавоб: Биринчидан, ота-онани розилигисиз ва улардан яширинча қилинган никоҳ ҳисобга ўтмайди[1]. Иккинчидан, “Аллоҳ учун никоҳли турмушга чиқдим” дебсиз. Ота-онасидан яшириниб никоҳли турмушга чиқиш Аллоҳ учун турмуш қуриш бўлади деб ким айтди сизга?! Сизга ким шундай деган бўлса, сизни алдабди. Бу мутлақо нотўғри тушунча. Учинчидан, ҳомиладорлигингизни Аллоҳнинг қадарига тўнкаманг, у ўз қилмишингиз ва хатонгиз маҳсулидир. Энди буни тузатиш ёки тузатмаслик ўз ихтиёрингизда. Болани олдиришга келсак, у ҳақида қуйидаги ҳаволадан маълумот олишингиз мумкин. Кейингиз саволингизга келсак, сиз хато ва нотўғри йўлни танлаб бўлибсиз. Энг тўғриси, оилангиз билан маслаҳатлашиб бир ишга қўл уришингиз керак эди. Энди фарзандингиздан ҳам кечманг, отангиздан ҳам кечманг. Бўлиб ўтган нарсани борича айтинг. Тавба қилинг. Аввало Аллоҳдан, кейин оила-аъзоларингиздан кечирим ва афв сўранг. Агар отангизни розилигини олсангиз, янгитдан никоҳ ўқитинг ва уни эълон қилинглар.
Бундан бошқа оилавий масалаларни оилангиз билан ўзаро маслаҳатлашиб давом эттиринг.
https://www.musulmonlar.com/omilani-oldirish-mumkinmi/
[1] https://www.musulmonlar.com/yashirincha-niko-isobga-tadimi/
