Савол:
Пайғамбар алайҳиссалом эркакларга олтин ва ипакни ҳаром қилгани ҳақида бир-қанча ҳадислар бор. Лекин, Қуръонъони Каримда бу тақиқни тасдиқлайдиган бирорта ҳам оят йўқ эмиш. Сиз бу масалага қандай ёндашасиз? Эркаклар тилла узук тақишлари ёки тилла тиш солдириши ва ипак матодан кийим кийишлари мумкинми?
Жавоб:
Аллоҳ таоло Фотир сураси 12-оятда бандалари чиройли кийиниб юришлари учун денгизлар ва анҳорлардан турли зеб-зийнатлар чиқариб берганини билдиради ва бу хитоб эркак-аёл ажратмасдан барча инсониятга тегишли эканини маълум қилган.
“Икки денгиз бир бўлмайди – буниси яхши, ширин ва ютумли, буниси эса тузли ва бемаза. Ҳар биридан янги гўшт ейсизлар ва ундан тақинчоқлар чиқариб тақасизлар. Унинг фазлидан/ризқидан талаб қилишингиз учун, кемаларни денгизни ёриб кетаётганини кўрасан. Шукр қилгайсизлар!” (Фотир 35:12)
Қуръонда зийнатланишга, айниқса солат вақтида ёки масжидга боришда зийнатланиб боришга буюрган оятлар ҳам бор:
“Эй одам фарзандлари! Сажда қилинадиган (Аллоҳга бўйин эгадиган) ҳар ерда зийнатларингизни олинглар. Енглар, ичинглар, аммо меъёрдан ошманглар. Аллоҳ меъёрдан ошувчиларни ёқтирмайди.” (Аъроф 7:31)
Бу оятлар шуни баён қиладики, табиатда инсоният учун чиқарилган ҳар бир зийнат ҳалолдир. Бунга олтин ҳам, кумуш ҳам, ипак ва марварид-у дурлар ва бошқалари ҳам киради.
Бундан ташқари, қуйидаги оятда эса, Аллоҳ ҳалол қилиб чиқариб қўйган зийнатларни ҳаром қилишга ҳеч кимни ҳаққи йўқлигини такидлаб алоҳида оят ҳам нозил қилган:
“Айт: “Аллоҳнинг Ўз бандалари учун чиқариб қўйган зийнатини ва покиза ризқларни ким ҳаром қилди?!” Айт: “Улар дунё ҳаётида асосан мўминлар учун, (аммо бошқалар ҳам фойдаланади). Қиёмат куни эса, (улар) фақат мўминларга хос бўлади.” Биладиган кишиларга оятларимизни батафсил тушунтириб беряпмиз.” (Аъроф 7:32)
Демак, бу дунёда Аллоҳ таоло чиқариб қўйган табиатдаги зийнатлардан мўмин ҳам, кофир ҳам фойдаланиши мумкин. Лекин ўша зийнатлар охиратда фақат мўминларга тегишли бўлади.
Оятлардан маълум бўладики, мўминлар бу дунёда ҳам зийнатланиб юришга энг ҳақли кишилардир. Улар охиратда ҳам олтин-кумуш тақинчоқлар ва ипак матолар билан ясаниб юришади:
“Улар (мўминлар) Адн боғларига киради. У ерда олтин билакузуклар ва тақинчоқлар билан ясанадилар. Уларнинг у ердаги кийимлари ипак бўлади.” (Фотир 35:35)
Биламизки, Пайғамбар алайҳиссалом Аллоҳ ҳалол қилган нарсани ҳаром қилолмайди, ҳаром қилганини ҳалол қилолмайди. Зеро, ул зотга хоссатан қуйидаги оятлар нозил бўлган:
“Улар орасида Аллоҳ сенга нозил қилган Қуръон билан ҳукм қил. Уларни хоҳишларига эргашмагин. Улардан ҳушёр бўлки, Аллоҳ сенга нозил қилган Қуръонни бир қисмидан воз кечириб юбормасинлар…” (Моида 5:49)
“(Эй Муҳаммад!) Яратган Эгангдан сенга ваҳий қилинган (Қуръон)га эргаш.” (Анъом 6:106)
“Уларга бир оят билан келмаганингда: “Ўзинг тўқисанг бўлмайдими?”- дейишди. Айт: “Мен фақатгина яратган Эгамдан менга ваҳий қилинган Қуръонга амал қиламан, холос”. Бу – яратган Эгангиздан юборилган кўрсатмалардир ва (Унга) ишонадиган кишилар учун қўлланма ва раҳматдир.” (Аъроф 7:203)
Бу муборак оятлар шуни кўрсатадики, эркакларга олтин ва ипакни ҳаром қилганлиги ҳақидаги ривоятлар Пайғамбар алайҳиссаломга нисбатан тўқиб чиқарилган уйдирмалардир. Бундай ҳукм Пайғаmбар алайҳиссаломнинг оғзидан чиқиши мумкин ҳам эмас. Чунки, Аллоҳ у кишига фақат Қуръонъонга амал қилишга буюрмоқда, у киши ўзидан бирор нарса тўқиб динга янгича ҳаром олиб кириши ва уни шаръийлаштириши мумкин эмас.
