Савол: Вафот этган инсоннинг қазо намозларини исқоти учун давра қилса бўладими? Бу ҳақида Қуръонда нима дейилган?
Жавоб: Вафот этган инсоннинг қазо намозларини соқит қиламиз деб унинг ворисларидан пул олиш мутлақо асоссиз ва ботил нарсадир. Мана шу иш орқали олинган пул ҳаромдир. Чунки, бир инсоннинг пулини ботил йўл орқали ейиш ҳаромдир (Нисо 4:29). Аҳликитоблар орасида ўзини диндор ва билимдон кўрсатиб инсонларнинг мол-давлатини турли бахоналар ва хийлалар билан – ботил йўллар билан еб кетадиган кишилар Тавба сурасининг 34-оятида фош этиб қўйилган ва бу каби ишлардан қайтарилган:
Эй Мўминлар! Билимдонлар ва диндорларнинг кўпчилиги ростдан ҳам инсонларнинг мол-мулкларини нотўғри йўллар орқали ейди ва уларни Аллоҳнинг йўлидан тўсади. Олтин-кумуш (мол-давлат) йиғиб, уларни Аллоҳ йўлида сарфламайдиган кишиларга аламли азобни хушхабарини етказ!
Ўша олтин-кумушлар Жаҳаннам ўтида қизитилиб, уларнинг пешоналари, биқинлари ва орқаларига тамға қилиб босиладиган куни уларга шундай дейилади: “Бу – фақатгина ўз шахсий манфаатингиз учун йиққан хазинангиздир. Йиққан хазинангизни азобини тотинглар энди!” (Тавба 9:34-35)
Агар ҳозирда исқот учун деб пул олаётган диндорлар бу ишларидав воз кечмасалар ва олган пулларини ўз эгаларига қайтариб бермасалар, барча олган пуллари ҳаром бўлади ва аҳли китоб орасида сохта роҳиблардан фарқи қолмайди.
Уларнинг бу қилаётган ишлари диндаги бидъат деб айтилади. Чунки, Қуръони Каримда бунга буюрилмаган, Расулуллоҳ ва на саҳобалар алсо бундай қилмаган. Буни баъзи бир ҳуқуқшунослар Рамазон рўзасига алоқадор фидя деб қиёслаб олган. Ўша фидя эса, Рамазон ойида рўза тута олмаган кишилар эмас, аксинча, рўза тутишга имкони етган барча мусулмон бериши керак бўлган Рамазондаги фитр садақасидир. Демак, қиёланган нарсанинг ўзи ҳам улар ўйлагандек эмас.
