Савол: Имомга эргашиб орқасида жамоат бўлиб намоз ўқиган киши, имомга иқтидо қилдим деб ният қилиши шартми?
Жавоб: Хоҳ имомга эргашиб, хоҳ ўзи ёлғиз ўқисин, қайси намозни ким билан адо этаётганини сўз билан ифодалаш шарт эмас. Ният – қилаётган ишини ва ўша ишни нима учун қилаётганини билиб қилиш ва фарқига бориб бажаришдир. Агар имомни орқасида туриб намозни адо этаётган бўлса, демак, у киши намозни жамоат билан адо этишини билиб турибди ва бунга ичидан ният қилиб бўлган, мана шу нарсада у агар холис бўлса, бу энг муҳим нарса ҳисобланади. Жамоат билан намоз ўқиётганини билиб турибди, лекин намоз ўқишдан мақсади Аллоҳни буйруғини адо этиб Уни розилигига эриш эмас, балки, бошқа нарсани мақсад қилиб намоз ўқиётган бўлса, ана ўшанда нияти бузилган ҳисобланади. Ибодат учун қилинган ниятларда энг аввало мана шу жойига эътибор бериш керак. Чунки, Расулуллоҳ алайҳиссалом: “Амаллар ниятга қараб бўлади” – деб буюрган.
Расулуллоҳ ҳаёти давомида бирор марта ҳам намозга турган вақтида намоз учун сўз билан ният қилганлиги ҳақида хабар келмаган. Ибодатлардаги асосий нарса – Аллоҳ учун холисона дилдан ният қилишдир. Уни араб ёки бошқа тилларда сўз билан ифодалаш шарт эмас.
وَاتْلُ عَلَيْهِمْ نَبَأَ ابْنَيْ آدَمَ بِالْحَقِّ إِذْ قَرَّبَا قُرْبَانًا فَتُقُبِّلَ مِنْ أَحَدِهِمَا وَلَمْ يُتَقَبَّلْ مِنَ الْآخَرِ قَالَ لَأَقْتُلَنَّكَ ۖقَالَ إِنَّمَا يَتَقَبَّلُ اللَّـهُ مِنَ الْمُتَّقِينَ
Уларга Одамнинг икки ўғлини хабарини ўз ўрнида айтиб бер. Икковлари қурбонлик қилганларида, биридан қабул қилинди, бошқасидан қабул қилинмади. У (Ибодати қабул қилинмагани): “Албатта, мен сени ўлдираман”, деди. Бири эса: “Аллоҳ фақатгина тақводорлардан қабул қилади,” – деди.” (Моида 5/27)
Энг катта ва асосий тақво – Ниятида холис бўлиб, қилаётган ибодатида Аллоҳга ҳеч нарсани шерик қилмаслик ва ибодатни ёлғиз Аллоҳни розилиги учун қилишдир. Аллоҳ ана шундай кишилардангина қабул қилади.
