Савол: Рамазон ойидан бошқа ойларда ҳам Аллоҳ учун ихтиёрий рўза тутишга одат қилмоқчиман. Шу нафл рўзани ҳам рамазон рўзасини бузган нарсалар бузадими, ёки ҳукми фарқлими?
Жавоб: Рамазон рўзасини учта нарса бузади, булар: Ейиш, ичиш ва аёли билан жинсий муносабатда бўлиш. Бу уч нарсадан деб ҳисобланмаган ҳеч нарса рўзани бузмайди. Бу ҳақда Аллоҳ таоло Бақара сураси 187- оятида шундай марҳамат қилади:
أُحِلَّ لَكُمْ لَيْلَةَ الصِّيَامِ الرَّفَثُ إِلَىٰ نِسَائِكُمْ ۚ هُنَّ لِبَاسٌ لَّكُمْ وَأَنتُمْ لِبَاسٌ لَّهُنَّ ۗ عَلِمَ اللَّـهُ أَنَّكُمْ كُنتُمْ تَخْتَانُونَ أَنفُسَكُمْ فَتَابَ عَلَيْكُمْ وَعَفَا عَنكُمْ ۖ فَالْآنَ بَاشِرُوهُنَّ وَابْتَغُوا مَا كَتَبَ اللَّـهُ لَكُمْ ۚ وَكُلُوا وَاشْرَبُوا حَتَّىٰ يَتَبَيَّنَ لَكُمُ الْخَيْطُ الْأَبْيَضُ مِنَ الْخَيْطِ الْأَسْوَدِ مِنَ الْفَجْرِ ۖ ثُمَّ أَتِمُّوا الصِّيَامَ إِلَى اللَّيْلِ ۚ وَلَا تُبَاشِرُوهُنَّ وَأَنتُمْ عَاكِفُونَ فِي الْمَسَاجِدِ ۗ تِلْكَ حُدُودُ اللَّـهِ فَلَا تَقْرَبُوهَا ۗ كَذَٰلِكَ يُبَيِّنُ اللَّـهُ آيَاتِهِ لِلنَّاسِ لَعَلَّهُمْ يَتَّقُونَ
“Сизларга Рамазон кечасида хотинларингизга қўшилиш ҳалол қилинди. Аллоҳ сизлар ўзларингга хиёнат қилаётганларингни билиб, тавбаларингизни қабул қилди ва сизларни афв этди. Энди улар билан (рўза кечаларида ҳам) қовушаверинглар ва Аллоҳ сизлар учун ёзган нарсани (фарзандни) талаб қилинглар! То тонгдан оқ ип қора ипдан ажраладиган вақтгача еб ичаверинглар. Сўнгра кечгача рўзани бенуқсон қилиб тутинглар! Масжидларда эътикофда бўлган чоғингизда улар билан қўшилманг! Булар Аллоҳнинг чегараларидир. Бас, уларга яқинлашманглар! Одамлар ҳаром ишлардан сақланишлари учун Аллоҳ ўз оятларини мана шундай очиқ-равшан баён қилиб бермоқда.” (Бақара 2/187)
Кўриниб турганидек, Рамазонда рўзали инсонларга кундузи то шом вақтигача ейиш, ичиш ва аёли билан жинсий алоқа қилиш тақиқланган. Ана ўша уч тақиқдан биронтасига қасддан қўл урган инсон рўзасини бузган ҳисобланади. Бу ишлар ихтиёрий рўзаларга ҳам тааллуқли. Фарз намоз учун олинган таҳоратни нима амал бузса, нафл намоз учун олинган таҳоратни ҳам айнан ўша нарсалар бузади. Еб-ичиш ва жинсий алоқа турига кирмайдиган, яъни, қилган ишлари на еб-ичиш ва на жинсий алоқа деб ҳисобланмайдиган ишлар рўзани бузмайди.
