Савоб: Мусофир киши намозларини 4 ракъат қилиб ўқиса бўладими?
Жавоб: Муқимлик ҳолатида 4 ракаатли намозлар, сафарда бўлган вақтда аслида 2 ракаат бўлиб фарз қилинган. Я’ни мусофир киши намозини қисқартириши дегани бу – 4 дан 2 га озайтириши эмас, чунки аслида сафардаги намозлар ўзи аслида 2 ракаатлидир.
Нисо сураси 4/101-103- оятларда, мусофир киши 2 ракаатлик намозни, қаршидан душман чиқиб, душманнинг фитнасидан қўрққан вақтда, намозини 2 ракаатдан 1 ракаатга озайтиришини қаср яъни намозни қисқартирилиши эканини баён қилади. Бу ҳақдаги ояти карима шундай”
“Сафар қилиб бошқа ерларга борганингизда агар кофирлар фитнасидан қўрқсангиз, намозингизни қисқа қилиб ўқишингизда гуноҳ йўқ. Чунки кофирлар сизларга очиқ душмандир. (Эй Муҳаммад), қачон сиз (жанг майдонида) мўминлар орасида бўлиб, уларга имом бўлган ҳолда намоз ўқимоқчи бўлсангиз, улардан бир тоифаси қуролланган ҳолларида сиз билан намозга турсинлар. Бас, қачон сажда қилишгач (яъни намознинг бир ракаатини ўқиб бўлишгач), орқаларингга бориб, (сизларни қўриқлаб) турсинлар ва ҳали намоз ўқимаган бошқа тоифа келиб сиз билан бирга намоз ўқисинлар. Улар ҳам эҳтиёт чораларини кўриб, қуролланиб олсинлар.
Кофирлар сизлар қурол-яроғ ва асбоб-анжомларингиздан ғафлатда бўлган пайтингизда устингизга бирданига ҳамла қилишни истайдилар. Агар ёғингарчилик туфайли азият чексангизлар ёки бемор бўлсангизлар, қуролларингизни ечиб қўйишингиз гуноҳ эмас. Аммо эҳтиёт чорангизни кўриб қўйинглар. Албатта Аллоҳ, кофирлар учун хор қилувчи азобни тайёрлаб қўйган. Намозни адо этар экансиз, турган, ўтирган ва ён тарафларингиз узра Аллоҳни ёд этингиз! Қачонки хотиржам бўлгач, намозни тўла-тўкис адо этингиз! Чунки намоз – мўминларга вақти чегараланган қилиб фарз бўлди.” (Нисо 4/102-103)
Бу оятларга кўра, Муҳаммад алайҳиссалом 2 ракаат қилиб тўлиқ ўқиган, саҳобалар эса, 1 ракаатдан ўқишган. Мана шу 1 ракаат ўқиш намозни қисқартириш дегани.
Пайғамбар алайҳиссалом сафарда намозларни бир марта бўлса ҳам 4 ракаат ўқиганлиги ҳақида ма’лумот ё’қлиги ҳам шунга ишорат қилади. Демак, сафарда фарз намозлар аслида 2 ракаат ўқилади.
