Савол: Мусулмонлар бўлиниб-бўлиниб, фирқа-фирқа бўлиб кетмасликлари ва бир тану бир жон ва диндор ака-ука бўлиб яшашлари учун нима қилиши керак?
Жавоб: Бу ҳақда Аллоҳ таоло шундай буюрган:
وَاعْتَصِمُوا بِحَبْلِ اللَّـهِ جَمِيعًا وَلَا تَفَرَّقُوا ۚوَاذْكُرُوا نِعْمَتَ اللَّـهِ عَلَيْكُمْ إِذْ كُنتُمْ أَعْدَاءً فَأَلَّفَ بَيْنَ قُلُوبِكُمْ فَأَصْبَحْتُم بِنِعْمَتِهِ إِخْوَانًا وَكُنتُمْ عَلَىٰ شَفَا حُفْرَةٍ مِّنَ النَّارِ فَأَنقَذَكُم مِّنْهَا ۗ كَذَٰلِكَ يُبَيِّنُ اللَّـهُ لَكُمْ آيَاتِهِ لَعَلَّكُمْ تَهْتَدُونَ
«Барчангиз Аллоҳнинг Қуръонига¹ боғланинг ва бўлинманг! Аллоҳнинг сизга берган неъматини эсингиздан чиқарманглар: бир-бирингизга душман бўлганингизда дилларингизни У ошно қилиб қўйди ва Унинг неъмати сабаб биродарларга айландингиз; сизлар дўзах чоҳининг ёқасида эдингиз, сизларни ундан халос қилди. Тўғри йўлда юришингиз учун оятларини Аллоҳ сизларга мана шундай очиқлаб бермоқда.» (Оли Имрон 3/103)
Демак, мусулмон киши бўлинмаслиги ва фирқаланмаслиги учун аввало Қуръонни маҳкам ушлаши керак. Бу ҳақида Аллоҳ яна шундай марҳамат қилади:
وَلَا تَكُونُوا كَالَّذِينَ تَفَرَّقُوا وَاخْتَلَفُوا مِن بَعْدِ مَا جَاءَهُمُ الْبَيِّنَاتُ ۚ وَأُولَـٰئِكَ لَهُمْ عَذَابٌ عَظِيمٌ
“Бир-бирини очилқлаб берадиган (оят)лар келганидан кейин ҳам бўлиниб кетган ва бир-бирлари билан ихтилоф қилиб, талашиб-тортишган кимсалар каби бўлманглар! Ўшандай кимсалар учун улкан азоб бор”. (Оли Имрон 3/105)
وَأَنَّ هَـٰذَا صِرَاطِي مُسْتَقِيمًا فَاتَّبِعُوهُ ۖ وَلَا تَتَّبِعُوا السُّبُلَ فَتَفَرَّقَ بِكُمْ عَن سَبِيلِهِ ۚذَٰلِكُمْ وَصَّاكُم بِهِ لَعَلَّكُمْ تَتَّقُونَ
«Албатта, мана шу Менинг тўғри йўлим, шу йўлга эргашинглар! (Бошқа) йўлларга эргашманглар. Акс ҳолда у йўллар сизларни Аллоҳнинг йўлидан айириб ташлайди. Хатолардан сақланиб қоласизлар — деб, У сизларни мана шундай қилишга буюрмоқда.» (Анъом 6/153)
¹ Нисо 4/174-175 оятлари ва бошқа алоқадор оятларга асосан, янада тушунарли бўлсин ва очиқча баён қилинсин деб «Аллоҳнинг Қуръонига» деб тафсирий маъно бердик.
