Савол: Инсонлар ҳар бир қилган хатти-ҳаракати учун жавобгар бўлади, деб биламиз. Сайловларда биз кимгадир овоз бериб депутат қилиб сайлаганимизда, мабодо улар бирон бир хато ишга қўл урсалар, уларнинг қилган хатолари ва жамиятга етказган зарарларида диний томондан биз ҳам қисман жавобгар бўламизми?
Жавоб: Овоз бериш – бир омонатни ўз эгасига топшириш ҳисобланади. Зотан, ҳар бир ишни ўз эгасига топшириш Аллоҳнинг амридир (Нисо сураси 58-оят). Сиз ўзингиз учун қадрли бўлган нарсаларни сиз учун ишончсиз бўлган одамга ишониб топширмаганиздек, депутат сайловларида ҳам овозингизни ўзингиз ишонмаган одамга бермаслигингиз керак. Муносиб эмаслигини ва у ишга қобилиятсиз эканини билиб туриб, ҳамда у одамни нотўғри ишларга қўл ураётганини кўриб туриб ҳам унга овоз берсангиз, унда албатта қилган ишингизни ваболига қоласиз. Аммо, сиз қобилиятли яхши инсон деб танлаган одам кейинчалик сиз ўйлагандек бўлиб чиқмаса ҳам, сиз барибир савобли ишга қўл урган бўласиз. У инсоннинг қилган ёмон иши ўзига бўлади.
Бу масалада қуйидаги ояти каримани унутмаслик керак:
“Ким бир яхши ишда шерик бўлиб орқасида туриб берса, у ишдан унга бир ҳиссадорлик пайдо бўлади. Ким бир ёмон ишда шерик бўлиб орқасида туриб берса, унга у ишдан жавобгарлик юклатилади. Аллоҳ ҳар нарсани кузатиб туради.” (Нисо 4/85)
