Савол: Аёллар махсус ўзлари учун қурилган ҳаммомга борса гуноҳ бўладими? Мен шундай деб эшитдим.
Жавоб: Сизга бу гапни айтган инсон, умумий ҳаммомларда бир-бирини аврат ерларига кўз тушиб қолишларнинг эҳтимоли кўпроқ бўлганини инобатга олган ҳолда шундай деган бўлиши мумкин. Лекин, аврат ерларни бегоналарга кўриниб қолишини олдини олган ҳолда ҳаммомга бориш динимизда тақиқланмаган.
Ҳаммомга борган аёллар аврат ерлари бегона аёлларнинг назарига тушиб қолишидан ниҳоятда эҳтиёт бўлиши керак. Нур сурасининг 30 ва 31-оятларида бу ҳақда қаттиқ такидланган.
Аёлларнинг бегона аёлларга кўзи тушиб бўлмайдиган аврат ери олд ва орқа аъзолари, ҳамда сон билан бел орасидаги юмшоқ иккита орқа қисм ва ўша миқдордаги кенглик ва катталикдаги олд сон қисмлардир. Мана шу миқдор аёлни бегона аёлга бўлган аврат аъзоси ҳисобланади. Шу боис, аёлларнинг ҳаммомга бориб киядиган ички кийимларининг узунлиги энг камида 35-40 см. бўлиши керак. Бир аёлни бегона бир аёл учун тиззаси ва сони аврат қисмига кирмайди.
Эркакларнинг бегона эркакаларга аврат ҳисобланадиган аъзолари ҳам худди аёллар кабидир. Эркакларда ҳам тизза ва сон қисми аврат деб ҳисобланмайди. Аврат ерларини бундай белгилашимизда Аъроф 7/22, 26, Тоҳа 20/121 оятларни, ҳамда Бухорий ва Муслим китобидаги Анас ибн Моликнинг Хайбар ғазотига Расулуллоҳ билан бирга чиқиб, йўлда Расулуллоҳни изори кўтарилганида у кишини оппоқ сонига қарагани ҳақидаги ҳадисни, бундан ташқари, Муслим ва Аҳмад ривоятларида келтирилган, Расулуллоҳ Оиша онамизнинг ҳужрасида сонлари очиқ ҳолда ёнбошлаб ётганида Абу Бакр р.а. киришга рухсат сўрагани, Расулуллоҳ рухсат бергани ва ўшандай сони очиқ ҳолда қолавергани ҳақидаги ҳадисларни далил қилиб олдик. Икки тизза ва сон аврат дейилган гапларга далил қилиб келтирилган баъзи заиф ривоятлар ҳам бор. Лекин, ҳалол-ҳаром масалаларидаги ҳукмлар фақатгина Қуръони Карим оятлари ва ўша оятларни ҳикмат йўли орқали очиқлаб берувчи Расулуллоҳнинг соғлом сўзларидан олинади.
