Савол:
Пайғамбарлар сони қанча?
Жавоб:
Ассалому алайкум. Қуръони Каримда номи айтилган пайғамбарлар сони 25 та. Лекин бундан бошқа яна пайғамбарлар ҳам ўтган. Буни Нисо сурасининг 164, Анъом сураси 83-89 ва Ғофир сурасининг 78-оятларидан билиб оласиз. Демак, Қуръонда хабари келтирилган пайғамбарлардан бошқа яна биз билмаган пайғамбарлар ҳам бўлган.
Қуръонда номи келтирилган пайғамбарлар шулардан иборат:
Одам. Идрис. Нуҳ. Ҳуд. Солиҳ. Иброҳим. Лут. Исмоил. Исъҳоқ. Яқуб. Юсуф. Айюб. Шуайб. Мусо. Ҳорун. Юнус. Довуд. Сулаймон. Илёс. ал-Ясаъ. Закариё. Яҳё. Зул-Кифл. Ийсо. Муҳаммад (алайҳимус-салом).
Юқорида айтилган оятлар:
“Аввал Биз сенга қиссаларини айтиб берган элчиларга ҳам, айтиб бермаган элчиларга ҳам ваҳий қилганмиз…» (Нисо 4:164)
“Шубҳасизки, сендан олдин ҳам элчилар юборганмиз. Улардан сенга қиссасини айтиб берганларимиз ҳам бор, сенга қиссасини айтиб бермаганларимиз ҳам бор…» (Ғофир 40:78)
“Халқига қарши Иброҳимга шу далилни бердик[59]. Муносиб билганимизни даража-даража юксалтирамиз. Яратган Эганг тўғри қарор берувчидир, билувчидир.
Иброҳимга (хизматини тақдирлаб) Исъҳоқ ва Яъқубни бердик. Барчасини тўғри йўлга қабул қилдик. Ундан аввал Нуҳни ҳам тўғри йўлга қабул қилганмиз. Унинг зурриётидан Довудни, Сулаймонни, Айюбни, Юсуфни, Мусони ва Ҳорунни ҳам тўғри йўлга қабул қилганмиз. Муҳсинларни[61] шундай мукофотлаймиз.
Яна, Закариё, Яҳё, Исо ва Илёсни ҳам тўғри йўлга қабул қилдик. Барчаси яхшилардандир.
Исмоил, Алясаъ, Юнус ва Лутни ҳам тўғри йўлга қабул қилдик. Барчасини замондошларидан афзал қилдик.
Уларнинг ота-боболаридан, зурриётларидан ва ака-укаларидан ҳам… Уларни танлаб олдик ва уларни ҳам тўғри йўлга қабул қилдик.
Мана шу Аллоҳнинг йўли. У муносиб бўлганларни ҳидоят қилади. Агар (пайғамбарлар Аллоҳга) ширк қўшганида, қилган (яхши) ишлари ҳабата бўлиб кетарди.
Булар – Биз уларга китоб, ҳикмат ва пайғамбарлик берган кишилардир. Агар у (кофир)лар буларни инкор қилса, ўрнига буларни инкор қилмайдиган қавмни вакил қилиб келтириб қўямиз.» (Анъом 6:83-89)
Бу оятлардан маълум бўладики, Илоҳий китоблар сони 4 дона ҳам эмас, 19 дона ҳам эмас. Чунки, ҳар бир пайғамбарнинг қўлида китоби бўлган.
Бу ҳақида қўшимча маълумот учун қаранг:
Илоҳий Китоблар 4 дона ва 100 та саҳифа дейишади, шу тўғрими?
