Савол: Кунимизда кўплаб оналар болаларини бир йил ва ҳатто ундан ҳам кам муддат эмизиб, кейин сутдан чиқариб юборишмоқда. Аксарият оналар болалар учун тайёрланган махсус сунъий озуқалар, ёки ҳайвон сутидан фойдаланиб келмоқда. Бу нарсага фан олимлари ҳам салбий қарайди, чунки, она сутини ўрнини боса оладиган ҳеч нарса йўқ дунёда бола учун. Бу нарсага Ислом дини қандай қарайди?
Жавоб: Албатта, Аллоҳ яратган асл табиий неъматни ўрнини ҳеч нарса боса олмайди. Янги туғилган чақалоқни ҳам ва унинг онасини ҳам Аллоҳ яратгани сабабли, болани саломатлиги ва соғлом ва тўғри ривожланиши учун она сути билан озуқаланишдаги энг муносиб ва тўғри муддат қанча эканини ҳам Аллоҳ жуда яхши билади. Шунга кўра Аллоҳ оналар болаларини икки йил тўлиқ эмизадилар деб марҳамат қилган. Алоқадор оят қуйидагича:
وَالْوَالِدَاتُ يُرْضِعْنَ أَوْلَادَهُنَّ حَوْلَيْنِ كَامِلَيْنِ ۖ لِمَنْ أَرَادَ أَن يُتِمَّ الرَّضَاعَةَ
“Оналар болаларини икки йил тўлиқ эмизадилар. Бу – тўлиқ эмизишни хоҳлаганлар учундир.” (Бақара 2/233)
Оятга кўра, оналар болаларини икки йил ўз сутлари билан тўлиқ эмизишлари керак. Она ва болани таъминотини эса шариати Илоҳий отага юклаган. Агар бола эмизикли чоғида эр-хотин ажрашиб кетган бўлса ҳам, болани ва онани барча таъминотини ота адо қилиши керак.
Болани соғлигига она сути орқали қандайдир зарар етиши хавфи бўлмаган ҳолатда, асло болани сутдан чиқариб бўлмайди.
Соғлиги ва куч-қуввати заифлиги сабабли она болага сут етказиб бера олмаётган бўлса, бу нарсаларни олдини олиш ва онани соғлигини тиклаш учун болани отасидан мажбурий равишда таъминот талаб қилинади. Чунки, Аллоҳ таоло болани емоқ-ичмоқ ва кийим-кечак билан таъминлашни ота зиммасига юклаган.
Маълум сабабларга кўра болани ўз она сути билан эмизишни иложиси бўлмаган тақдирда, бошқа аёлни сути билан бўлса ҳам икки йил тўлиқ эмизиш керак. Бу вазифа ҳам (бошқа эмизикли боласи бор она топиш ва моддий томондан таъминлаш) отага юклатилади.
